O mes de maio chegou con forza ao CPR Santa Cristina, e con el, unha das celebracións máis queridas da nosa tradición galega: a festa dos Maios. Unha ocasión chea de cor, natureza e música que nos conecta co noso entorno e coa nosa historia.
Durante toda a semana, a comunidade educativa do cole
estivo traballando con moito entusiasmo na elaboración do noso Maio escolar,
seguindo os costumes que nos transmitiron os nosos maiores. Con xestas,
fiunchos, flores silvestres e moita ilusión, construímos entre todos unha
estrutura que levou o espírito da primavera ata o adro da igrexa de Santa
Cristina, onde o fixemos medrar con coplas, risas e pandereteiras.
O momento máis agardado foi, sen dúbida, cando nos xuntamos
para cantar as coplas deseñadas polo profe Dani, que soubo darlles á
poesía popular un toque de retranca e actualidade que fixo rir e gozar tanto
aos pequenos coma aos maiores. Entre as favoritas do público soaron:
"Maio, maio, quérote ao
meu lado, con tanta chuvia teño os zapatos furados..."
"En cuarto de Primaria damos moita caña!"
"Os nenos de segundo son un demo... nunca se calan e teñen moito xenio!"
Estas e outras moitas rimas foron interpretadas con moita
paixón polos nosos rapaces, que demostraron que a tradición segue viva,
renovada e máis creativa ca nunca.
Celebrar o Maio é tamén aprender a mirar o mundo con
ollos de festa, a recoñecer o valor do traballo en equipo e a manter viva a
nosa identidade cultural. Parabéns a todo o alumnado e profesorado que fixeron
posible esta xornada tan especial!
Longa vida ao Maio!
