Antonte, mércores 18 de xuño, o noso cole
encheuse de movemento e ilusión coa celebración do Día da Roda. Unha xornada
diferente na que as bicicletas, os patinetes, os monopatíns e todo tipo de
trebellos con rodas foron os grandes protagonistas.
O alumnado tivo a oportunidade de
traer de casa os seus vehículos favoritos e participar nun circuíto divertido e
seguro deseñado polo profe Raúl, que puxo toda a súa creatividade para
transformar o patio nun auténtico espazo de xogo e habilidade.
Foi marabilloso ver como nenos e nenas
de diferentes idades compartían risas, animaban uns aos outros e gozaban do
pracer de moverse en liberdade. Non faltaron os zigzags, os retos de
equilibrio, e por suposto, moitos aplausos.
Este tipo de actividades son unha
mostra máis de que aprender e medrar tamén pode ser sinónimo de xogar, cooperar
e pasalo ben. Grazas a todas as familias pola colaboración e aos profes pola
organización. E sobre todo, grazas a vós, rapazada, por facer do Día da Roda
unha experiencia inesquecible!
